مصرع كيلوبترا الجزء الثاني

دي الجزء التاني
المشهد الاول
كليوباترا صباح المعركه في البلكونه بتاعة القصر
-مولاتي السفن جاهزه
-- طيب خلاص انا نازله كل حاجه جاهزه ؟
-جاهزه يا مولاتي
-و انطونيو
-مستني من الصبح يا مولاتي
-ربنا يستر يا شرميون
-خايفه من ايه يا مولاتي انت مش امبارح صلتي للاله امون و قدمتى القرابين يبقى خلاص
-على رايك ربنا يستر
مشهد 2
كليوباترا في مخدعها ومعاها كام هضبة سوده (عبيد سابقا ) وطواويس (الجمع اللي دماغي بتاع طاووس) و حطت فول ميك- اب و كردان فيروز من الطويل اوي اوي ده و الباروكه وناقص فستان حلو كده وتبقى هيفاء وهبي و تستمع على (اي –طوب) بتاعها الي اغنيه للفنانه نفرتيتي عجرم ( نقش نقاقيش و مسك الازميل ونقش على الحيط)
وشرميون على سطح السفينه واقفه مع حبيبها و اتقفوا على ان اول ما المعركه تخلص يروح يطلب ايدها من الملكه ويعيشوا في تبات ونبات .............
المهم الملكه تنده شرميون
-ايه يا بت اكتافيوس ظهر و لا لسه
-لسه مولاتي
-يا خوفي انطونيو خيبه بعد عنك ومايعرفش عن البحر غير انه مياه مالحه ده حتى السمك كان فاكره بيتزع في الارض.....معندوش ايه خبره عن الخناقات بتاعة البحر
-و لا اكتافيوس و حياتك يا مولاتي بس اللي عرفته انه معاه واحد اسمه (اجريبا) مشهور اوي انه بيفهم في الخناقات بتاعه البحر بس لسه خارج من السجن اصله اتمسك في خناقه بتاعه قبرص ... عارفها يا مولاتي
-اه عارفاها
-اه هو بقى لما اتمسك خد سنتين سجن في سجن روما العمومي و لسه عليه المراقبه
-و انتى عرفتي الكلام منين يا شرميون
-اصل الواد حبيبي اللي فوق كان محبوس معاه و كنت بوديله العيش و الحلاوه لحد ما حضرتك كلمتى العريف هيرولس عشان يطلعه
-هو كان معاه في الخناقه بتاعه قبرص
-ظلم يا مولاتي ظلم
-و انا مالي يا ختي ظلم و مش ظلم ...بس انت متاكده من موضوع انه لسه مخلصش مراقبه ده
-اه يا مولاتي مانا الحارس بتاع اكتافيوس سالته و قالي نه فاضله شهر على مايخلص المراقيه
-و انتى تعرفي حارس اكتافيوس منين يا بت
-وصيفتك يا مولاتي
-جدعه يا بت ...اه معاكي رصيد
-اه يا مولاتي خمسين سحتوت
-طيب كلمى العريف هيرولس و قوللي على الموضوع بتاع اجربيا ده
-هوا يا مولاتي
تبدا الملكة بالهدوء و تصعد الي سطح السفينه لتراقب البحر وجماله و بيمنا هي بتراقب اللي قولنا عليه فاذا بالمعلم انطونيو عمال يشاورها ويبعت بوسه مع الهوا والحوارات دي و شاور لها برضه انه عازمها على العشا باليل على الباخره بتاعتهعلى اكله سمك مزروع في اجود الاراضي الرومانيه (انا وضحت اعتقاد انطونيو بتاع السمك .. فوق)
تشيح الملكه بوجهها في كسوف ظاهري وجواها بيقول (امشي يا خويا انا مش ناقصاك الساعه دي ..خش شوف هتحارب ازاي و لا هتعمل ايه )
والاهبل عمال يشاورلها ... ماعلينا
مشهد 3
على سطح سفينه اكتافيوس
-كله تمام يا اجريبا
-–تمام يا معلم اكتافيوس كله تمام ده عمل له حته خطه ماتخرش الميه عرفتها ايام ماكمنت في السجن من اعظم مجرم بتاع خناقات البحر المجرم (مجرم- نايوس) االي عمل خناقه قبرص
-يا راجل
-اه والله ..بس خطه جامده يا معلمي
-ازاي
-شوف يا معلمي الواد انطونيو يخش بسفنه وسطنا نروح احنا محوطينه من ورا و نقعد نضرب عليه سهام مولعه نار ومازوت حتى مانغرق سفنه
-طيب وسفن كليوباترا
-دي شغلتك يا سيدي المعلمين
-لا بتفهم ياد
-كله منك يا معلمي
-اه صحيح انت خلصت المراقبه ولا لسه
-خلصتها من شهر يا معلمي وعملت حركه جامده اوي
-ايه
-قلت للحارس بتاعك اللي البت شرميون مصاحباه ده ايام ماكنت مع قيصر ان انا لسه عليا شهر في المراقبه
-اه و بعدين
-اكيد طبعا كليوباترا هتتصل بالعريف هيرولس و تقدم بلاغ
-اه
-بس يقوم العريف يجي يفتش السفن مايقليش حاجه و نحط حته حشيش كده و لا حاجه في سيفنه كليوباترا ونخليهم يقبضوا عليها بتهمه ازعاج السلطات وحته الح-شيش هتعمل شغل برضه هتخلي العريف يزعل منها و انت عارف الباقى
-و السهام يا خفيف هنوديها فين
-سيبها عليا يا معلمي
-لا عفارم عليك يا واد مجرم بصحيح ...اما انتي يا كليوباترا حسابك معايا عسير

......................... يا تري كليوباترا هتقع في فخ اكتافيوس واجريبا ...هذا ماسيجيب عنه الجزء القادم

ده الجزء التاني ياريت تقروه

جميل اوى

wlahy gamed motttt el 7war da 5sosn anhom best5dmo ello'3a btt3tna

3ezen el goz2 el talt bsor3a b2a